ربـاعيّـات جـاهيـن( الجـزء الثـامـن)

[ندعوك للتسجيل في المنتدى أو التعريف بنفسك لمعاينة هذا الرابط]

[ندعوك للتسجيل في المنتدى أو التعريف بنفسك لمعاينة هذه الصورة]
ربـاعيّـات جـاهيـن الجـزء الثـامـن

[ندعوك للتسجيل في المنتدى أو التعريف بنفسك لمعاينة هذه الصورة]

لو فيه سلام في الأرض وطمان وأمن
لو كان مفيش ولا فقر ولا خوف جبن
لو يملك الانسان مصير كل شئ
انا كنت اجيب للدنيا ميت ألف ابن
عجبي
*******
العشب طاطا للنسايم ونخ
أخضر طري مالهش في الحسن أخ
عصفور عبيط انا.. غاوي بهجه وغُنا
ح انزل هنا.. وانشالله يهبرني فخ
عجبي
*******
أوصيك يابني بالقمر والزهور
أوصيك بليل القاهرة المسحور
وإن جيت في بالك.. إشتري عقد فل
لأي سمرا.. وقبري إوعك تزور
عجبي
*******
غمض عينيك وارقص بخفة ودلع
الدنيا هي الشابة وانت الجدع
تشوف رشاقة خطوتك تعبدك
لكن انت لو بصيت لرجليك.. تقع
عجبي
*******
حاسب من الاحزان وحاسب لها
حاسب على رقابيك من حبلها
راح تنتهي ولابد راح تنتهي
مش انتهت أحزان من قبلها؟
عجبي
*******
يأسك وصبرك بين إيديك وانت حر
تيأس ما تيأس الحياة راح تمر
أنا دقت من دا.. ومن دا عجبي لقيت
الصبر مر وبرضك اليأس مر
عجبي
*******
ولدي نصحتك لما صوتي اتنبح
ما تخفش من جنّي ولا من شبح
وان هبّ فيك عفريت قتيل إسأله
ما دافعش ليه عن نفسه يوم ما اندبح
عجبي
*******
خوض معركتها زي جدك ما خاض
صالب وقالب شفتك بامتعاض
هي كده.. ما تنولش منها الأمل
غير بعض صد ورد ووجاع مخاض
عجبي
*******
كام اشتغلت يا نيل في نحت الصخور
مليون بئونه والف مليون هاتور
يانيل أنا ابن حلال ومن خلفتك
وليه صعيبه عليّا بس الأمور
عجبي
*******
ولدي إليك بدل البالون ميت بالون
انفخ وطرقع فيه على كل لون
عساك تشوف بعينك مصير الرجال
المنفوخين في السترة والبنطلون
عجبي
*******

[ندعوك للتسجيل في المنتدى أو التعريف بنفسك لمعاينة هذه الصورة]

تسلمى ماما زينب على اختياراتك الموفقة دائما فهى فعلا كلمات بسيطة لكن تحمل فى طياتها الكثير واكرر شكرى ودمتم فى حفظ الله ورعايته منتظرين بشغف كل جديد

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

شكرا لكى ابنتى ياسمين

على اطرائك الجميل

جزاك الله كل خير

[ندعوك للتسجيل في المنتدى أو التعريف بنفسك لمعاينة هذه الصورة]